Денес во просторите на Литература.мк Суперстор – Дајмонд мол, беше промовирана осмата по ред збирка песни и раскази „БЗР од МАЛИ НОЗЕ 2026“, проект кој веќе осум години успешно ја гради културата на безбедност и здравје преку детската креативност, образованието и силните пораки на најмладите. Преку своите творби, учениците не само што создаваат литература, туку испраќаат пораки за одговорноста, грижата за човечкиот живот и значењето на безбедноста во секојдневниот живот и во светот на трудот.
Во изминатите осум години проектот прерасна во едно од најзначајните едукативни движења во областа на безбедноста и здравјето при работа во државата. Во периодот од 2019 до 2026 година учество земаа 141 основно училиште, 1.170 ученици, а беа создадени вкупно 1.174 песни и раскази. Овие бројки не претставуваат само статистика, туку доказ дека културата на безбедност може успешно да се учи, негува и пренесува уште од најрана возраст.
Проектот „БЗР од МАЛИ нозе“, кој е одобрен од Министерството за образование и наука и Бирото за развој на образованието (Мислење бр. 12-883/4 од 06.04.2023 година), претставува единствен пример за поврзување на образованието, креативноста и подигнувањето на јавната свест за безбедноста и здравјето.
Во рамките на годинешниот повик учество земаа 105 ученици од 16 основни училишта од различни делови на државата. Беа доставени 107 творби, а по спроведената административна и содржинска евалуација 100 творби ги исполнија критериумите на Повикот, од кои 65 песни и 35 раскази.
Но зад бројките стои нешто многу поважно.
Стојат детски гласови кои нè потсетуваат на вредности што честопати ги земаме здраво за готово.
Еден од младите автори, Ведран, пишува:
„Не сум херој што ризикува сè во еден здив,
туку електромонтер што знае, да се врати дома: ЗДРАВ И ЖИВ!“
Во овие стихови е содржана суштината на безбедноста при работа. Вистинскиот херој не е човекот што непотребно ризикува, туку човекот што работи одговорно и безбедно и на крајот од денот се враќа дома кај своето семејство.
Силна порака испраќа и Мирјан:
„Единствената цел пред него стои
да ги превезе сигурно патниците свои.“
Овие стихови потсетуваат дека зад секоја професија стои огромна одговорност. Без разлика дали станува збор за пилот, лекар, пожарникар, рудар, возач, градежник или електромонтер, зад секое работно место стои човечки живот, семејство и иднина.
Нина мудро порачува:
„Безбедноста не е само збор,
туку навика што вреди многу повеќе од златен двор.“
Навистина, безбедноста не започнува на работното место. Таа започнува дома, во училиштето и во навиките што ги градиме уште како деца. Кога безбедноста ќе стане навика, таа станува најсилната заштита на човечкиот живот.
Давид испраќа уште една моќна порака:
„Безбедноста не е товар, туку крилја за лет,
со неа ќе го освоиш овој голем и широк свет.“
Токму затоа постои овој проект. Да создава генерации кои нема да ја гледаат безбедноста како обврска, туку како вредност што им овозможува сигурно да учат, создаваат, работат и напредуваат.
А можеби наједноставната и најсилната порака ни ја остави Ива:
„На крајот од денот насмевка да имаш,
дома жив и здрав секогаш да се враќаш.“
Во овие едноставни стихови е содржана суштината на сè што претставува безбедноста. Зад секоја процедура, зад секое правило, зад секој заштитен шлем, ракавица или сигурносен појас стои една единствена цел: да се зачува човечкиот живот.
Токму затоа овие детски творби не се само литературни дела. Тие се пораки. Тие се лекции. Тие се потсетник дека безбедноста е израз на одговорност, зрелост, грижа и почит кон животот. Тие нè учат дека зад секое правило за безбедност стои нечие семејство, нечие дете и нечие утре.
Проектот продолжува и во иднина со истата мисија: да создава генерации кои ќе ја препознаваат безбедноста како лична и општествена вредност и кои ќе придонесуваат за создавање побезбедни училишта, побезбедни работни места и побезбедни заедници.
ПРОДОЛЖУВАМЕ!
Продолжуваме да ја шириме културата на безбедност, здравје, одговорност и превенција. Продолжуваме да ги едуцираме најмладите. Продолжуваме да ги поттикнуваме да размислуваат, создаваат и зборуваат за вредностите што спасуваат животи.
„ПРОДОЛЖУВАМЕ, затоа што културата на безбедност се учи од мали нозе!“ ✍️
